ថ្ងៃសុក្រ ទី៤ ខែឧសភា ឆ្នាំ២០១២ ម៉ោង ១៧:២២
[កីឡាករ អ៊ឹង បូរិន (ឆ្វេង) និងកីឡាករ ហ៊ឹម សារ៉ាន់
រាជធានីភ្នំពេញ ៖ អ៊ឹង បូរិន មកពីក្លឹបគជសារកីឡា និងហឹុម សារ៉ាន់ មកពីក្លឹបក្រសួងការពារជាតិ ដែលជួបគ្នានៅលើសង្វៀនស្ថានីយទូរទស្សន៍ CTN នាថ្ងៃសៅរ ទី៥ ឧសភា នេះ នៅក្នុងព្រឹត្តិការណ៍នៃការប្រកួតប្រដាល់វគ្គជម្រុះវិលជុំ ពូល A ជុំទី៥ ដើម្បីឈានទៅដណ្តើមតំណែងម្ចាស់ខ្សែក្រវាត់ជើងឯក១០លានរៀល របស់ស្រាផែនដី ក្នុងប្រភេទទម្ងន់៦៥គីឡូក្រាម ។
ថ្វីបើគេទាំង២នាក់ ទើបតែបានឆ្លងកាត់ការប្រកួតចំនួន២លើកម្នាក់ក្តី ប៉ុន្តែចំពោះលទ្ធផលវិញ គឺសុទ្ធតែទទួលបរាជ័យទាំង២លើករួចមកហើយដូចគ្នា ។ ចំណែកឯការជួបគ្នាលើកនេះ គេអាចដឹងបានយ៉ាងច្បាស់ថា មានម្ខាងជាអ្នកចាញ់ពិតប្រាកដ ប៉ុន្តែជ័យជម្នះនេះមិនអាចស្រោចស្រង់ស្ថានភាពអាក្រក់របស់គេ ឱ្យមានភាពល្អប្រសើរវិញបានឡើយ ព្រោះបន្ទាប់ពីជួបគ្នាលើកនេះទៅ គឺគេនៅសល់តែ២ប្រកួតម្នាក់ទៀតប៉ុណ្ណោះ នឹងត្រូវបញ្ចប់ហើយវគ្គប្រកួតជម្រុះក្នុងពូលនោះ ។
ឡុង សុភី មកពីក្លឹបសាលវ័ន្តកីឡា ជួបនន់ ជំនិត មកពីក្លឹបស៊ីម៉ាក់ ។ រវាងគូនេះមិនដូចគ្នាទេ សុភី ប្រកួតបាន៣លើក ឈ្នះទាំង៣លើកជាប់គ្នា មាន៩ពិន្ទុនៅក្នុងដៃរួចហើយ ។ ចំណែកឯ ជំនិត វិញប្រកួតបាន៣លើកដូចគ្នា ប៉ុន្តែរបូតអស់មួយលើកទៅវិញ ទើបតែរកបាន៦ពិន្ទុប៉ុណ្ណោះ លើកនេះគេត្រូវការឈ្នះច្រើនជាង ដើម្បីរកឱ្យបាន៣ពិន្ទុបន្ថែមទៀត ។ យ៉ាងណាក៏ដោយល្បិចប្រយុទ្ធនៅលើសង្វៀនរបស់ ជំនិត មិនសូវល្អ ដូច សុភី ឡើយ បូករួមទាំងស្នៀតកែងនិងជង្គង់ផង ។
នៅក្នុងពូល A ដែលមាន ឡុង សុភី, នន់ ជំនិត, ពុទ្ធ ឆាយរិទ្ធី, អឹុង បូរិន និង ហ៊ឹម សារ៉ាន់ នោះ មានតែ សុភី ម្នាក់ទេដែលមានពិន្ទុនាំមុខគេដាច់ ចំណែក នន់ ជំនិត និងពុទ្ធ ឆាយរិទ្ធី កំពុងតែមាន៦ពិន្ទុម្នាក់ដូចគ្នា ស្ថិតនៅលេខរៀងទី២ នៃតារាងបណ្តោះអាសន្ន ។
រីឯគូប្រកួតមិត្តភាព នៅក្នុងសប្តាហ៍នេះដែរផាន់ សុវណ្ណ មកពីក្លឹបមិត្តប៉ូលិសជួប វង្ស គង់រាជ មកពីក្លឹបបុរីនាគរាជ ។ ស៊ូ វណ្ណៈ មកពីក្លឹបឃ្លាំង មឿងកីឡា ជួប ហាក់ ចាន់ធី មកពីក្លឹបរ៉ាហាប់ស្វាយប៉ាក ៕
No comments:
Post a Comment