ថ្ងៃអាទិត្យ ទី៦ ខែឧសភា ឆ្នាំ២០១២ ម៉ោង ១៦:៣៥
ការប្រកួតរវាងកីឡាករ MATTHIASជាមួយកីឡាករ ឡៅ ស៊ីណាត
រាជធានីភ្នំពេញ ៖ ឡៅ ស៊ីណាត មកពីក្លឹបកងទ័ពពិសេសឆត្រយោងលេខ៩១១ សន្លប់ក្រោមស្នៀតកែងរបស់កីឡាករជើងខ្លាំងមកពីអាល្លឺម៉ង់ ANDREAF MATTHIAS ចំណែកចាន់ រតនា មកពីក្លឹបខេមរៈខ្លាហោះ បានធ្វើឱ្យជើងខ្លាំងមកពីកូរ៉េ THUNG PONG KWANG ចុះចាញ់នៅត្រឹមទឹកទី៣ប៉ុណ្ណោះ សម្រាប់ការប្រកួតនៅសង្វៀនស្ថានីយទូរទស្សន៍ប៉ុស្តិ៍លេខ៣ កាលពីថ្ងៃសៅរ៍ទី៥ ឧសភា ។
ប្រវត្តិប្រកួតរបស់ជើងខ្លាំងមកពីអាល្លឺម៉ង់ ម្នាក់នេះ ធ្លាប់ឡើងសង្វៀនបានរហូតដល់ទៅ១១០ដងឯណោះ ក្នុងនោះឈ្នះ៨០ដង ចាញ់៣០ដង និងផ្តួលគូប្រកួតឱ្យសន្លប់នៅលើសង្វៀន៣២ដង ។ ចំណែកឡៅ ស៊ីណាត វិញ ប្រកួតបាន៨៥ដង ឈ្នះ៧៧ដង ចាញ់៧ដង ស្មើម្តង ប៉ុន្តែស៊ីណាត មានសំណាងអាក្រក់បំផុតសម្រាប់ការប្រកួតលើកនេះ បើទោះជាគេអាចទប់ទល់បានយ៉ាងល្អបំផុតនៅទឹកទី១ក៏ដោយ ។MATTHIAS មានស្នៀតប្រយុទ្ធល្អបំផុតទាំងស្នៀតកែង និងជង្គង់ គេចាប់ផ្តើមបញ្ចេញស្នៀតកែងវាយសម្រុកទៅលើស៊ីណាត យ៉ាងសាហាវនៅទឹកទី២ ។ស៊ីណាត ដែលព្យាយាមបញ្ចេញស្នៀតជើងទាត់ល្វែងខាងក្រោមរបស់ MATTHIAS មិនបានប្រយ័ត្នផ្នែកខាងលើត្រូវ MATTHIAS បុកចូល១កែងចំសៀតផ្កាពេញទំហឹងបណ្តាលឱ្យដួលទៅលើសង្វៀនទាំងជំហរ ។
ឯចាន់ រតនា វិញ បានទាត់ត្រូវដៃខាងឆ្វេងរបស់កីឡាករ THUNG PONG KWANG បណ្តាលឱ្យប្រកួតលែងកើតនៅទឹកទី៣ ។ កីឡាករមកពីកូរ៉េ ម្នាក់នេះ បានបង្ហាញនូវភាពទន់ខ្សោយរបស់ខ្លួនចាប់តាំងពីទឹកទី២មកម៉្លេះ ហើយ រតនា ចាប់ផ្តើមសម្រុកចូល និងប្រើស្នៀតជើងទាត់កាន់តែខ្លាំងនៅទឹកទី៣ ។ KWANG ព្យាយាមការពារស្នៀតជើងរបស់រតនា ដែរ តែមិនអាចរងនឹងទម្ងន់ស្នៀតជើងនេះ បានឡើយ ។ អាជ្ញាកណ្តាលបានសម្រចបញ្ឈប់កីឡាករកូរ៉េនៅទឹកទី៣ ប៉ុន្តែអ្នកទស្សនាភាគច្រើនគិតថា មិនគួរបញ្ឈប់ឡើយ ព្រោះគេអាចនៅមានលទ្ធភាពប្រកួតតទៅទៀតបាន ។
រីឯគូប្រកួតកម្ពុជា និងកម្ពុជាវិញ លាប សំណាង មកពីក្លឹបកងពលតូចលេខ៧០ យកឈ្នះខុម ពិសិដ្ឋ មកពីក្លឹបអូដឹមកីឡាដោយពិន្ទុ។សល់ ប៊ុនហ៊ូវមកពីក្លឹបអាស៊ីកីឡា យកឈ្នះសានរាជសីហ៍មកពីក្លឹបសាលវ័ន្តកីឡាដោយពិន្ទុ៕
